2023

2023ko Aste Nagusia; Donostiako Aste Nagusian antolatutako 300 jarduera baino gehiagoz gozatu duten milioi bat eta berrehun mila pertsona baino gehiagok umorez eta giro onez bete dituzte festa “biribil” hauek, Eneko Goia hiriko alkatearen hitzetan.

Publiko guztiei zuzendutako askotariko eskaintza batekin, asteari hasiera eman zioten jai-giroko kanoikadaren eta “Artillero” soinuen protagonista hiriko bizitza sozial eta kulturalean oso errotuta dauden bi kolektibo izan ziren: garuneko desgaitasuna duten pertsonen familien Aspace Gipuzkoa elkarteko kideak, senideak, boluntarioak eta hezitzaileak, eta Gipuzkoako Argazkilari Elkarteko bazkideak, elkartearen sorreraren 75. urteurrena ospatu zutenak.

Astea ohiko bizitasunarekin bizi izan zen, eta normaltasuna, parte-hartze tasa handia eta gure hiriko kaleetan antzemandako giro ona nabarmendu ziren. Astean, zorionez, ez zen gorabeherarik edo gertakari larririk izan.

Sagueseko kontzertuek 66.000 lagunetik gora bildu zituzten, eta aipatzekoa da Danny Ocean abeslari venezuelarrarenak eta En Tol Sarmiento arabarrenak erakarri zuten publiko ugaria.

Gainera, milaka pertsonak parte hartu dute gainerako jardueretan: discofesta, lehiaketa gastronomikoak, kirol-probak, haurrentzako jolasak eta gainerako musika- eta kultura-jarduerak.

Aldez aurretik izena eman beharreko jarduerek azkar agortu zituzten eskainitako plazak, eta parte hartu ahal izateko itxaron-zerrendak ezarri ziren.

Sagues, Kursaal, Boulevard, Konstituzio plaza, Easo plaza… agertokietako publikoaren leialtasunari Gros eta Antigua auzoetan antolatutako jardueretan parte hartu zuen publikoaren sendotzea gehitu behar zaio.

Azken urteotan jai-egitarauari gehitu zaizkion jarduera berriak arrakastatsuak izaten ari dira eta publikoak gogoz espero eta gozatzen dituen jarduera bihurtzen ari dira; aurten Urgullen egin den Dantz Pointa –eguraldi txarra gorabehera–, Uliako Harria, Urumea ibaian egindako jarduerak…

Eta leialtasunaz eta sendotasunaz ari garenez gero, ezin dugu aipatu gabe utzi, zalantzarik gabe, Aste Nagusiko jardueren programan gehien esperotako jarduera arrakastatsuetako bat: Su Artifizialen Nazioarteko Lehiaketa. 2023an, 650.000 ikusle baino gehiago bildu ditu (gutxi gorabeherako kopurua). Lehiaketak kalitate handia erakutsi du bildumetako bakoitzean.

Ohikoa den bezala, Aste Nagusiaren azken egunean Kontxako Badia izan zen Madrilgo Vulcano pirotekniak eskainitako piromusikalaren agertokia, jaien aste handiari amaiera eman ziona, Spotifyren erabiltzaileek gehien erreproduzitu zituzten 20 euskal artisten kantuak eta gure inguruan une horretan gehien entzuten ari ziren zenbait doinu erabiliz. Ikuskizun piromusikalaren gauak aste osoko jendetzarik handiena bildu zuen: 110.000 pertsona inguru.